भूमिहीन समस्याबारे मन्त्रीबाट जवाफ माग

काठमाडौं, चैत ३ ।

राष्ट्रियसभाका सांसदले सुकुम्बासी, भूमिहीन समस्या र अव्यवस्थित बसोबासबारे मन्त्रीको जवाफ माग गरेका छन् ।

संघीय संसद, राष्ट्रियसभाको सोमबारको बैठकको विशेष समयमा सांसदले सुकुम्बासी आयोग बनाइएपनि समस्या ज्यूँका त्यूँ रहेको जनाउँदै सम्बन्धित मन्त्रीको जवाफ माग गरे ।

नेकपाका खिमलाल भट्टराईले नेपालको भूमिसम्बन्धी समस्या लामो समयसम्म समाधान हुन नसकेको बताउँदै भूमिहीनका समस्या समाधान नभएसम्म समाजवाद आउन नसक्ने ठोकुवा गरे ।

नेपाली कांग्रेसका जीतेन्द्रनारायण देवले राष्ट्रिय प्रजातन्त्र पार्टी र साझा पार्टीले धर्म्निरपेक्षता र गणतन्त्रविरुद्ध आवाज उठाइरहेको भनी सदन र सरकारको ध्यानाकर्षण गराए ।

उनले भने–‘महिनौंदेखि संवैधानिक परिषद् र मन्त्रिपरिषद्को बैठक बस्न सकेको छैन, जनताले सुशासनको अनुभूति गर्न पाएका छैनन् । भ्रष्टाचार मौलाएको छ । महँगी, कालोबजारी बढ्दै गएको छ ।’

सांसद चक्रप्रसाद स्नेहीले वर्तमान निर्वाचन प्रणालीले गर्दा नै देशमा भ्रष्टाचार मौलाएको र देश धराशायी बन्दै गएको आरोप लगाउँदै संविधान संशोधन गरेर भएपनि प्रत्यक्ष निर्वा्चित प्रधानमन्त्री र पूर्ण समानुपातिक निर्वाचन प्रणाली बनाउनुपर्ने माग गरे ।

सांसद इन्दु कडरियाले भारतका कारण सिमानामा नेपाली जनताले भोग्नुपरेको समस्या समाधान गर्न संसद र सरकारको ध्यानाकर्षण गराइन् ।

सांसद मृगेन्द्रकुमार सिंह यादवले ठेकेदारको लापरबाहीले हुलाकी राजमार्ग समयमै सम्पन्न हुन नसकेकामा सरकारको ध्यानाकर्षण गराए ।

उनले संविधानलाई संशोधन गरेर भएपनि सर्वसस्वीर्य बनाउनुपर्ने माग गरे ।

सांसद विमला घिमिरेले ‘कोभिड–१९’ रोक्न नेपालको तराईका जिल्लाका खुला सिमानामा कडाइ गर्नुपर्ने बताइन् ।

सांसद हरिराम चौधरीले विभिन्न जिल्लामा अवैधानिक ढंगले वन फडानी भइरहेको सन्दर्भ उल्लेख गर्दै प्रभावकारी अनुगमन गरी दोषीमाथि कडा कारबाहीको माग गरे ।

सांसद राधेश्याम पासवान र मायाप्रसाद शर्माले पछिल्लो समयमा भ्रष्टाचार बढ्दै गएको भन्दै अन्त्य गर्नुपर्नेमा जोड दिए । (रासस)