आठजना मृतक पर्यटकको सनाखत (अपडेट)

हेटौँडा, माघ ७ ।

मकवानपुर जिल्लाको थाहा नगरपालिका–४ दामनस्थित पानोरमा रिसोर्टमा मृत्यु भएका आठ भारतीय पर्यटकको सनाखत भएको छ ।

रिसोर्टका कोठामा गएराती बसेका पर्यटकले हिटर बालेर सुतेका कारण निसास्सिएर मृत्यु भएको हुनसक्ने जिल्ला प्रहरी कार्यालयले जनाएको छ ।

प्रहरी निरीक्षक ललनप्रसाद कुर्मीले मृत्यु हुनेमा भारत केरलाका ३८ वर्षीय रन्जित कप, ३४ वर्षीय इन्द्र कप, ३७ वर्षीय प्रवीण, ३२ वर्षीया सरिया, ५ वर्षीय अभी, ७ वर्षीया अर्चना, ५ वर्षीय बैशनव, ९ वर्षीया बन्द्रा रहेका जानकारी दिए ।

नेपाल घुम्न आएका १५ पर्यटकमध्ये आठको मृत्यु भएको हो । उनहरु रिसोर्टको १०१ नम्बर कोठामा बास बस्नुभएको थियो । एउटै कोठामा आठ जना सुत्नुभएका ती पर्यटक मंगलबार बिहान बेहोस अवस्थामा फेला परेका थिए ।

उनीहरुलाई हेलिकप्टरबाट काठमाडौंको ह्याम्स् अस्पताल लगिएको थियो । पोखराबाट सोमबार साँझ उहाँहरु सो रिसोर्टमा बास बस्न आउनुभएको पालुङ इलाका प्रहरी कार्यालयले जनाएको छ । (रासस)