पोखरा १९ भोटीखोलामा मोटेरेबल पुल बन्ने, पुलको महानगरपालिका प्रमुख जिसीद्वारा शिलान्यास

पोखरा, कार्तिक ७ ।

पोखरा महानगरपालिका वडा नम्बर १९ को भोटीखोलामा मोटेरेबल पुल बन्ने भएको छ । साविक लामाचौर र पुरनचौर गाविसको सिमानामा पर्ने भोटीखोलामा निर्माण हुने पुलको बिहीबार शिलान्यास गरिएको छ । लामाचौर—माछापुच्छे« ग्रामीण सडक अन्तर्गत पर्ने उक्त पुलेको पोखरा महानगरपालिका प्रमुख मानबहादुर जिसीले शिलान्यास गरेका हुन् ।

पुल शिलान्यास कार्यक्रममा बोल्दै प्रमुख जिसीले जनताले तिरेको े तिरबाट नै महानगरले पुल बनाउन लागेको बताए । ‘महानगरले ढाड सक्ने गरी कर उठायो भन्ने गुनासो सुनिन्छ,’ प्रमुख जिसीले भने,‘जनताले तिरेको करबाट संकलित रकमलाई महानगरले विकास निर्माण लगायतमा खर्च गरेको छ ।’ कर सही ढंगले सहुपयोग भएको छ कि छैन जनताले चाँसो दिनुपर्ने र दुरुपयोग भए खबरदारी गर्ने दायित्व नगरवासीको भएको उनले बताए ।

पुल निर्माणको काममा गुणस्तर कायम गर्न कुनै सम्झौता नगरिने बताउँदै प्रमुख जिसीले जनताले तिरको करबाट नै महानगरले पुल निर्माण गर्न लागेकाले पुल निर्माणमा निगरानी गर्न स्थानीय जनतालाई आग्रह गरे । पुल निर्माणलाई त्यहाँका स्थानीय बासिन्दाको आर्थिक उपार्जनसँग जोडेर हेर्नुपर्ने समेत प्रमुख जिसीको भनाइ छ । महानगरपालिकाले यस वर्ष ७ वटा पुल निर्माणको कामलाई अगाडि बढाउने उनले जानकारी दिए ।

शिलान्यास कार्यक्रममा बोल्दै पोखरा महानगरपालिका इन्जिनियर धु्रव भट्टराईले २५ मिटर लम्बाई र साढे सात मिटर चौडाइको आरसीसी पुल निर्माण हुने बताए । उनका अनुसार पोखरा महानगरपालिकाले उक्त पुलनिर्माणको लागत अनुमान २ करोड ९२ लाख ९७ हजार अनुमान गरेकोमा श्रीगीता कन्स्ट्रक्सन स्याङ्जाले २ करोड ३८ लाख ५५ हजारमा काम सक्ने गरी सम्झौता गरेको छ ।

निर्माण कम्पनीसँग गत भदौ ५ गते सम्झैता गरिएको छ भने २०७७ मंसिरमा सम्पन्न गर्ने समयसिमा तोकिएको छ । निर्माण कम्पनीका राजेश मल्लले तोकिएको समय भन्दा अगाडि नै पुल निर्माण गरिसक्ने प्रतिवद्धता व्यक्त गरेका छन् । पुल निर्माणपछि साविक लामाचौर, पुरनचौर र माछापुच्छे«, सार्दीखोला, करुवा लगायतका क्षेत्रका बासिन्दा लाभान्वित हुनेछन् ।

पोखरा १९ का वडा अध्यक्ष शोभामोहन पौडेलको विकासले गतिलिएको बताउँदै वडामा पनि आवश्यक पूर्वाधार निर्माण गर्न महानगर लागि परेको बताए । कार्यक्रममा नेकपा वडा कमिटी १९ अध्यक्ष विष्णु गौतम, वडा नम्बर १९ का वडा सदस्य कृष्ण गौतम र वडा सदस्य कोपिला केसीले विकास निर्माण र पुलको बारेमा बोलेका थिए ।