साग ह्याण्डबलको अन्तिम चरणको छनोट सम्पन्न 

पोखरा, असोज ३० ।

नेपालमा आयोजना हुने १३ औं दक्षिण एसियाली खेलकुद (साग) अन्र्तगतको ह्याण्डबल महिला तथा पुरुष खेलाडीहरुको बिहिबार पोखरामा अन्तिम छनोट सम्पन्न गरिएको छ ।

यहि मंसिर १५ देखि २४ गते सम्म पोखरामा १३ औं साग अन्र्तगत हुने ह्याण्डबल महिला र पुरुषतर्फ १६–१६ जना खेलाडी अन्तिम छनोटमा परेका छन् ।

नेपाल ह्याण्डबल संघका अध्यक्ष तेज गुरुङका अनुसार पुरुषतर्फ छनोटमा परेका खेलाडीहरुमा विशाल बस्नेत, दिनेश श्रेष्ठ, विशाल नेपाली, दिपक सिं बोहोरा, संदिप कार्की, रणसिं रावत, इन्द्र नारायण चौधरी, मदन चुनारा, श्रीबहादुर सिंजाली, यमबहादुर पुन, आषिश अधिकारी, केशव विष्ट, सरोज सिंह, सन्तोष श्रेष्ठ, हेमन्तथापा र शरण थापा रहेका छन् ।

यसैगरि महिला टिम तर्फ छनोटमा परेकाहरुमा बविता श्रेष्ठ, अर्चना न्यौपाने, संगिता चौधरी, कविता राई, बन्दना राई, दुर्गा बोहोरा, रञ्जना राई, शान्तिकला राई, झिनमाया थापा, आईता लामू शेर्पा, रामकुमारी चौधरी, शारदा विक, कल्पना वली, उमा राई, निशा राई र देव कुमारी बास्कोटा रहेका छन् ।

छनोट समितीले  पुरुष र महिलातर्फ ५–५ जना बैकल्पिक खेलाडी समेत छनोट गरेको छ । महिलातर्फ बैकल्पिक खेलाडीमा जिना राई, साधना वम, विष्णा बोगटी, देबी श्रेष्ठ र मञ्जु राउत छन् भने पुरुषमा सरुणमान श्रेष्ठ, तारा केसी, प्रविण गुरुङ, जोनेश पुर्जा र पवन छन्त्याल रहेका छन् ।

छनोट समितीमा नेपाल ह्याण्डबल संघका उपाध्यक्ष जिवन बस्नेत, नेपाल ह्याण्डबल संघका सचिब केशव पाठक, विदेशी प्रशिक्षक (पोर्चुगल)जोआ फ्लोरेन्सियो, ह्याण्डवलका मुख्य प्रशिक्षक एवं तालिम तथा प्रशिक्षण विभाग राखेपका उप–निर्देशक हिमाल राज दाहाल र वरिष्ठ प्रशिक्षक अरुणलाल कर्ण रहेका थिए ।

खेलाडी छनोट घोषणा कार्यक्रममा बोल्दै संघका अध्यक्ष एवं नेपाल ओलोम्पिक कमिटीका उपाध्यक्ष तेज गुरुङले अनुशासनलाई प्राथमिकताका साथ पालना गर्न खेलाडीहरुलाई आग्रह गरे ।

यसै गरि ह्याण्डबलका उपाध्यक्ष एवं गण्डकी प्रदेशका सांसद मोहन रेग्मीले सागमा सबै खेलाडीले राष्ट्रको गरिमालाई माथी उठाउने गरि आफ्नो खेल प्रस्तुत गर्न सक्दो प्रयास गर्न अनुरोध गरे ।

साग तयारीका लागि ह्याण्डबलको महिला तथा पुरुष टिमका राष्ट्रिय खेलाडीहरु गते असोज १६ गतेबाट बन्द प्रशिक्षणमा रहेका थिए । बन्द प्रशिक्षण अन्र्तगत पहिलो चरणमा २८–२८ जना र दोश्रो चरणमा २२–२२ जना खेलाडी बन्द प्रशिक्षणमा रहेका थिए । दोश्रो चरणको करिब एक महिनाको बन्द प्रशिक्षण पछि १६–१६ जना खेलाडी अन्तिम चरणका लागि छनोट भएका हुन् ।

छनोट भएका खेलाडीले १३ औं साग अन्र्तगत ह्याण्डबल प्रतिष्पर्धामा उत्रने छन् ।