ट्रकले किच्दा एक जनाको मृत्यु

हेटौंडा, असोज २८ ।
हेटौंडामा ट्रकले किच्दा मंगलबार एक जनाको घटनास्थलमै मृत्यु भएको छ । हेटौंडाबाट अमलेखगन्जतर्फ जाँदै गरेको ना ४ ख ९०५२ नम्बरको एक्साभेटर लोड गरेको ट्रकले सोही दिशातर्फ जाँदै गरेको ना ४ त ८४९३ नम्बरको ब्लक लोड भएको ट्रयाक्टरलाई ठक्कर दिएको थियो ।

ट्रकको ठक्करले ट्रयाक्टरमा सवार धादिङ जिल्लाका ३५ वर्षीय अर्जुन ढुङ्गानाको मृत्यु भएको प्रहरीले जनाएको छ । ट्रकले ठक्कर दिएपछि ट्रयाक्टर अनियन्त्रित भई ना ७ ख ६०६१ नम्बरको बसमा ठोक्किन पुगेको प्रहरीले जनाएको छ ।

बससँग ठोक्किएपछि ट्रयाक्टरमा सवार ढुङ्गाना उछिट्टिएर सडकमा खसेका थिए। सडकमा बजारिएका ढुङ्गानालाई ट्रकले किचेपछि उनको घटनास्थलमै मृत्यु भएको जिल्ला प्रहरी कार्यालय मकवानपुरका प्रहरी उपरीक्षक मुकेश कुमार सिंहले बताए । दुर्घटनापछि दुईवटै सवारी चालकलाई प्रहरीले नियन्त्रणमा लिएको छ ।