पोखराको शालिक विवाद अदालत पुग्यो

पोखरा, असोज २६ ।
पृथ्वीचोकको भद्दा आइल्याण्ड भत्काएपछि फेरि शहीद लखन थापाको शालिक राख्न लागिएको काम रोक्न उच्च अदालत पोखरामा रिट दर्ता भएको छ ।
विश्व हिन्दू महासंघ कास्की अध्यक्ष शंकर खराल र सदस्य मीलनप्रसाद तिवारीले मंगलबार निशेधाज्ञा माग गर्दै रिट दर्ता गरेका हुन् । उक्त रिटमा बुधबार भएको बहसपछि अदालतले विपक्षीका नाममा कारण देखाऊ आदेश जारी गरेको छ ।
न्यायाधीश रामजी प्रधानको एकल इजलाशले उक्त आदेश जारी गरेको हो । रिटमा जिल्ला प्रशासन कार्यालय कास्की, पोखरा महानगरपालिका र मगर संघ कास्कीलाई विपक्षी बनाइएको छ ।
सहरका बीच चोकमा शहीद, विभूतिका शालिक राख्न आवश्यक नभएको, पृथ्वीचोकमा शहीद लखन थापाको शालिक हटाएसकेको अवस्थामा फेरि राख्न लागिएकोमा उक्त कार्य रोक्न रिटमार्फत माग गरिएको छ ।
शालिक राख्ने नै हो भने पृथ्वीनारायण शाहको राख्न रिटमा माग गरिएको छ । बुधबारको बहसमा निवेदकको तर्फबाट माधव बास्तोला, गीता आचार्य, भरतराज पौडेल, खिमबहादुर थापाले बहस गरेका थिए ।