गोरखाबाट हराएको बाइक ६ महिनापछि लमजुङमा भेटियो

पोखरा, जेठ २४ ।
गोरखाको पञ्चकन्या सुन चाँदी पसलको पार्किङ स्थलबाट ६ महिनाअघि हराएको क्रसफायर मोटरसाइकल प्रहरीले लमजुङमा बरामद गरेको छ । नक्कली नम्बर प्लेट राखेर चलाइराखेको सूचनाको आधारमा ४ नं. प्रदेश प्रहरी कार्यालय, पोखरा र लमजुङ प्रहरीको संयुक्त टोलीले बेसिशहर नगरपालिका–७, बाणिज्य बैंक अगाडीबाट बरामद गरेको हो ।

न्यु गोरखा मनकामना कन्ट्रक्सन, बाग्लुङको नाममा दर्ता भएको ग १३ प ८१४४ नम्बरको क्रसफायर एसजेड २५० आरआर मोटरसाइकलमा बा ८७ प ११७९ नम्बर राखिएको भेटिएको छ ।

यसैबीच, प्रहरीले यातायात कार्यालय, गण्डकीसँगको समन्वयमा मोटरसाइकलका धनी गोरखाको सहिद लखन–६, का ४० वर्षीय मनोज श्रेष्ठलाई बिहीबार हस्तान्तरण गरिएको छ । प्रदेश ४ का प्रहरी प्रमुख डिआईजी दानसिंह बोहराले कागजपत्र सहित आएका श्रेष्ठलाई बाइक हस्तान्तरण गरेका हुन् ।