पोखरा सस्तो बजारका सञ्चालक–गुण्डा नाइके राजु गोर्खाली पक्राउ

काठमाण्डौं, माघ २१ ।
गुण्डा नाइके राजु गोर्खाली काठमाण्डौमा पक्राउ परेका छन् । सुन्धारास्थित काठमाडौं मलका व्यापारीलाई धम्काएर जबर्जस्ती रकम असुली गरेको अभियोगमा उनलाई महानगरीय अपराध महाशाखाको टोलीले पक्राउ गरेको हो ।आइतबार गोर्खालीलाई नयाँ बानेश्वर चोकबाट पक्राउ गरेको प्रहरीले जनाएको छ ।

कर्मचारी सञ्चय कोषको स्वामित्वमा रहेको काठमाण्डौं मल गोर्खालीको समूहले गत वर्षदेखि भाडामा लिएर चलाएको थियो । मलमा सटरहरु अन्य व्यापारीलाई भाडामा दिने र व्यापारीसँग चर्को रकम असुल्दै आएका थिए। पैसा नदिए गुण्डागर्दी शैलीमा पसलमै ताला लगाउन थालेपछि व्यापारीको उजुरीको आधारमा गोर्खालीलाई पक्राउ गरिएको बताइन्छ ।

पृथ्वीचोक स्थित पोखरा सस्तो बजारका सञ्चालक समेत उनै हुन् । प्रहरीले गोर्खालीलाई संगठित अपराध मुद्दामा अनुसन्धान भइरहेको जनाएको छ। राजु गोर्खालीले २०५८ सालमा दरबारमार्ग स्थित रोयल क्यासिनोमा झगडा हुँदा राकेश लिम्बूको घाँटी रेटी हत्या गरेपछि चर्चामा आएका थिए। उनी ज्यान मुद्दामा १० वर्ष जेल बसेर ०६८ सालमा निस्किएका व्यक्ति हुन् ।

सुरुदेखि नै विवादित पोखरा सस्तो बजार अहिले पनि विवादमा छ । अनुमति नै नलिई तला थपेर सञ्चालन गरेपनि महानगरले कारबाही नगरी लाचार बनेको छ । पोखरामा यसको व्यवस्थापन युवराज खतिवडाले गरिरहेका छन् ।