सभापतिमा उठे शेरबहादुर देउवालाई हराउँछौं–गगन थापा

काठमाण्डौं, कार्तिक १८ ।
नेपाली कांग्रेसका युवा नेता गगन थापाले आगामी महाधिवेशनमा पार्टी सभापति शेरबहादुर देउवालाई पुनः उम्मेदवारी नदिन आग्रह गरेका छन् । नागरिक नेटवर्कको संवाद कार्यक्रममा उनले पार्टीको हितको लागि देउवा अब सभापति बन्न नहुने बताए । ‘पार्टी जीवनको लागि अब उहाँ सभापति बन्नु हुन्न’, थापाले भने, ‘यदी पुनः सभापतिमा उठ्नु भयो भने हराउँछौं ।’

आगामी मंसिरमा हुने महासमिति बैठकले पार्टी विधान संघीय संरचना अनुसार परिमार्जन गर्न लागेको बताउँदै उनले त्यस पछाडिका संरचनामा निर्वाचन नगरि मनोनयन गरेर पार्टी संरचना नेतृत्वले कब्जा गर्ने खतरा पनि उत्तिकै रहेको तर्फ उनले सचेत गराए ।

पार्टी भित्र उमेर हदको कुरा महासमिति बैठकमा उठाउने उनले बताए । ३० वर्ष विद्यार्थी, युवालाई ४० र पार्टीको कार्यकारी पदमा बस्नको लागि ७० वर्षको हद लगाउनु पर्ने उनको सुझाव छ । थापाले सरकार देखेर निरास भएको बताए ।

‘दुई तिहाइको सरकारले काम गर्छ भन्ने थियो तर त्यसो भएन’, उनले भने, प्रधानमन्त्रीले सबै आफुले जानेको जस्तो व्यवहार गर्नु भएको छ तर सत्य त्यस्तो हुँदैन ।’ उनले देशमा संरचनागत सुधारको खाँचो रहेको औंल्याए । संरचनागत सुधारले मात्र आर्थिक विकास र समृद्धिको यात्रा सफल हुने उनको बुझाइ छ ।

राजनीतिक स्थिरताले मात्र विकास नहुने थापाले बताए। ‘राजनीतिक स्थिरताले मात्र विकास हुन्थ्यो भने पञ्चायतमा पनि विकास हुनुपथ्र्यो’, थापाले भने, ‘अहिले सार्वजनिक संस्थान कमजोर हुँदा विकासको गति सुस्त भएको छ ।’

संघीयताको सफलता प्रति उनले शंका व्यक्त गरे। राजनीतिक नेतृत्वले संघीयता सफल बनाउन जोखिम लिन नसकेको बताउँदै थापाले भने, ‘प्रधानमन्त्री ओलीलाई संघीयता सबैभन्दा मन नपरेको विषय हो त्यसैले उहाँले कोअपरेट गर्नु भएको छैन ।’