पोखरामा शोरुमबाटै स्कुटर चोरियो, एकजना पक्राउ

पोखरा, कार्तिक २९ ।
शोरुमबाट स्कुटर चोरी गर्ने एक युवक पोखरामा पक्राउ परेका छन् । स्कुटर चोरीमा संलग्न दार्चुला घर भई पोखरा अमरसिंह चोक बस्दै आएका मदन रावललाई प्रहरीले बिहीबार स्कुटर सहित पक्राउ गरेको हो ।

रावललाई वडा प्रहरी रामबजारको टोलीले बिहीबार दिउसो अमरसिंह माबिको गेट नजिकैबाट पक्राउ गरेको वडा प्रहरी कार्यालय राम बजारका प्रमुख प्रहरी निरीक्षक दीपक केसीले जानकारी दिए । स्कुटर हराएसंगै शोरुम वरपरको सिसी क्यामेराको फुटेजलाई आधार मानी खोजीकार्य तीब्र पारिएकोमा २० घण्टाको अवधिमा फेला पार्न सफल भएको प्रहरी निरीक्षक केसीले बताए ।

रावलले बुधबार उत्तमचोक स्थित होण्डा शोरुमबाट सर्भि्सिङको लागी छोडेको ग १५ प ७४२ नम्बरको स्कुटर चोरेर हिडेको प्रहरीले जनाएको छ । पोखरा गणेश टोलका बबिसरा राना मगरले बुधवार शोरुममा सर्भि्सिङको लागी छाडेको स्कुटर चोरी भएको थियो ।

होण्डा शोरुमको चरम लापरबाहीकै कारण स्कुटर हराएको र शोरुममा सिसी क्यामेरा समेत जडान नगरेको भन्दै शोरुमका सञ्चालकलाई तत्काल सिसी क्यामेरा जोड्न र सतर्कता अपनाउन आग्रह गरेको प्रहरीले जनाएको छ ।