९ लाख रकमसहित जुवाखालबाट २३ जुवाडे पक्राउ

भतरपुर, फागुन ३ ।
प्रहरीले ९ लाख ३३ हजार नगदसहित २३ जुवाडेलाई चितवनबाट पक्राउ गरेको छ । भरतपुर महानगरपालिका–११, भोजाडको छिम्केश्वरी टोलबाट गएराति १२ बजे उनीहरुलाई पक्राउ गरिएको चितवन प्रहरी प्रमुख एसपी सुशीलसिंह राठौरले जानकारी दिए ।

जुवा खेलाइरहेको विशेष सूचना पाएपछि जिल्ला प्रहरी कार्यालय, चितवनकी प्रहरी निरीक्षक चिलिमाया तामाङ नेतृत्वमा टोली छापा पार्न पुगेको थियो । नियन्त्रणमा लिइएकाहरु गोरखा, चितवन र तनहुँका भएको बताइएको छ ।

पक्राउ परेका जुवाडेहरुले भ्यालेन्टाइन डे को अवसर पारेर कौडा खेलेको जनाएका छन् । नियन्त्रणमा लिइएकाहरुलाई जुवा ऐनअन्र्तगत कारबाही गरिने चितवनका प्रहरी प्रमुख एसपी राठौरले जानकारी दिए । गएको तिहारमा पनि जुवा खेल्ने विरुद्ध चितवन प्रहरीले अप्रेशन चलाएको थियो । त्यसक्रममा १ सय २० पक्राउ परेका थिए ।